وعد : وينك!

أثير : هذا انا داخلة عليك .. أوقف هنا عادي

وعد : إيوا المواقف حقت المبنى كله ..

أثير : يللا نازلتلك

وعد : نورتي الحتة

أثير : نورك والله .. ما شاء الله النيبورهود حقك لطيف 

وعد : أيوا أحس راقي كذا  ونظيف

أثير : محظوظة ما شاء الله تعالي عندي وشوفي كيف

وعد : خلاص دحين تنقلي وتفتكي من مستر باركينج ههههه

أثير : ههه استغفر الله بس

وعد : تفضلي نورتيني والله

أثير : نورك حبيبتي .. بسم الله ما شاء الله

وعد : ما راح أقولك أيش أفكر أسوي هنا أبغا أسمع منك أفكار حلوة ..

أثير : لا حبيبتي يعتمد انتي أيش جوك وأيش تبغي .. بالعكس مرة لا تسمعي أفكار من أحد

وعد : والله عندي أفكار كثيرة بس مدري حلوة ولا لا ..

أثير : خذيها وحدة وحدة .. عادي مو لازم على طول تبدأي تشتغلي على الشقة .. أجمعي أفكارك ورتبيها وشوي شوي ..

وعد : سويت مودبورد على بنترست .. شوفي هذي الصالة .. مرة تعجبني ..

وعد : سويت مودبورد على بنترست .. شوفي هذي الصالة .. مرة تعجبني ..

أثير : إيوا ما شاء الله تصميمها ومكانها جميل .. تحسي لامة البيت كذا ..

وعد : ايييوا أحب الصالة تكون كذا سنتر البيت ..

أثير : مساحات ما شاء الله .. تقدري تبدعي فيها مرا ..

وعد : عاد ما أستغني عنك 

أثير : يا عمري انا معاك .. أرسليلي ملف الاستلهام .. خلينا نبدأ منه ..

وعد : تمام .. حطيت فيه كل شيء غرف نوم تعجبني وغرف أطفال وكلو 

أثير : أفضل تخلي مودبورد لكل مساحة لحالها عشان يبان الثيم اللي تبغيه للمكان والإحساس .. صح البيبت كله له ستايل معين بس لكل غرفة إحساس خاص ..

وعد : هممم فعلاً ..

أثير : إيوا خلي لكل غرفة مودبورد حطي فيها الصور اللي تشبه إحساسك فاهمتني مو بس الشكل اللي تبغيه

وعد : إيوا فهمت عليك .. برضو بجمعلك استخدامات كل غرفة والناس اللي عايشين معايا انتي عارفتهم

أثير : لا فاهمة الدرس كويس هههه ..  صور .. استخدامات .. والناس اللي حيعيشوا معاك 

وعد : كيف شفتي المطبخ؟

أثير : مصمم كويس .. يعني التصميم فيه حيطلع مرتب .. لو الشباك كان أكبر شويا

وعد : مرة ما عجبني الشباك

أثير : إذا عالشباك بسيطة .. شقتك ما شاء الله ككل جميلة .. توفقتي 

وعد : إيوا الحمد لله مرتاحة لها كثير

أثير : برضو أبغا المخطط بشوف الأعمدة فين .. انتي حتهدي شي ..

وعد : والله مدري .. بمشي معاك خطوة بخطوة وأشوف اللي يحتاج أسويه ما عندي مشكلة 

أثير : إيوا أفضل كذا .. أفهمي نفسك وأيش تبغي في المكان بعدين أصلاً هو راح يبان بنفسه .. أيش حتسميها :) 

وعد : الشقة ! مو جاي على بالي شي دحين .. لازم أسميها يعني تحتاجي هذا الشي في التصميم!

أثير : لا مو احتياج .. بس لما الوحدة تسمي شقتها يعطيني مؤشر انها آخذه الموضوع بيرسونال أكثر .. 

وعد : هممم والله ما فكرت فيها .. وانا أقكر فيها كذا حبيت شقتي أكثر أحس

أثير : إيوا يفرق لما الوحدة تتعامل مع شقتها أو بيتها كأنه كيان كذا له روح .. عارفة

وعد : والله مرة حلو .. أحس تحمست .. حبيت الفكرة .. بسميها واعتبرها وحدة من بناتي هههه

أثير : إيوا بالضبط هو كذا .. لأن الموضو ع مو حيالله تصميم وديكور لا حياة.